Dako gid ang nangin pagbag-o sa kabuhi sang Silaynon vlogger humalin sang siya ang nagviral sa social media bangod sa pag-impersonate sa mga anchorman sang Bombo Radyo.
Sa interview sang Bombo Radyo kay Simon Peter Estacio, ang video kun sa diin siya ang nagapulpog sang drum kag naga-impersonate sang pag-anchor ang natabo sang Disyembre 2023 sang sila ang nagapractice sang PE sa stage.
Suno diri, nakita niya ang bass drum sa likod sang stage kag napinsaran lamang ang tripping nga sundon ang Bombo Radyo anchors, nga ginkakibot naman sang mga nagnilabay bangod sa mabaskog nga tingog sini apisar nga siya ang kilala nga member sang lgbtq+ community ukon isa ka gay.
Antes sini, aminado si Estacio nga may post man ini nga impersonation sa balita sang isa ka TV station apang nabura ang facebook sini, gani nagapati ini nga ang Bombo Radyo gid ang nakatadhana para sa iya.
Ang video ang sa karun nagdangat na sa 7 million views, apang suno diri, siya ang wala gid nakakwarta sa content bangod indi pa monetized ang iya facebook sadto.
Sa baylo, iban ang nakakwarta diri, bangod madamo sang nagkawat kag nagpost.
Sang lamharon pa, masami man nga gina-impersonate ni Estacio ang mga tingog sa drama kaangay sang Toyang Ermitanya kag Kondorilla, kag siya ang naghatag pa sang sample.
Suno diri, dako ang nangin pagbag-o sa iya nga kabuhi bangod siya ang gin-interview naman sang iban pa nga Bombo Radyo Ilonggo stations.
Ang engagement ang nakapasanyog sang iya confidence, kag sa karun nagahost na sa mga eskwelahan kaangay sang nakaligad kun sa diin siya ang naghost sa pinning sang Silay Institute.
Siya ang nagahost man sa selebrasyon sang kasal, bunyag kag birthdays.
Suno kay Estacio, tambay ini sadto kag kaangay nga wala sang plano sa kabuhi, apang ginduso sini ang kaugalingon nga magbag-o matapos ginhambalan nga siya ang “wala sang puturo”.
Siya ang nag-eskwela sa Alternative Learning System (ALS), nakasulod sa Senior High School tubtob nga naka-Kolehiyo.
Kag sa karun, ginakalipay sini nga makabulig sa tawo bilang Sangguniang Kabataan (SK) Kagawad.
Pahanumdom sini sa mga nagapanugod pa lamang sa vlogging nga indi magpatiplang sa mga negatibo nga komento, bangod indi gid tanan ang maplease.
Sa baylo, magpadayun lamang kag magpakabakod tubtob nga malab-ot ang handom kag mabag-o ang banas sang kabuhi.
