Ginakilala sang Philippine Drug Enforcement Agency-Negros Island Region (PDEA-NIR) nga “notorious pushers” ang vlogger kag ka-live in sini nga nadakpan sa ginpatigayon nga drug buybust operation sa Purok Magtiayon, Barangay 10, Bacolod City.
Madumduman nga nadakpan ang vlogger nga si Julia Peruelo kag iya live-in partner nga si alyas Christian, 32 anyos sang Agosto 25.
Sa report sang PDEA-NIR nakuha sa duha ang 13 ka sachet sang suspected shabu nga nagabug-at sang 50 grams kag may standard drug price nga P340,000 kag iban pa nga non drug items.
Sa interview sang Bombo Radyo Bacolod kay Agent Jan Capili, spokesperson sang PDEA-NIR, ginpasakaan sang kaso ang duha ka mga suspetsado kahapon.
Suno kay Capili, si Peruelo kag ang ka live-in sini ang gindakop kag duha man sila ang subject person bangud imposible man nga wala nakahibalo ang isa sa mga aktibidad sang partner sini.
Nagpanindugan si Capili nga legitimate ang ginpatigayon sang PDEA-NIR.
Dugang pa sini nga may kinamatarong ang isa pamilya sang nadakpan nga maghimo sang ila alegasyon batok sa ahensya.
Ang duha ka mga nadakpan ang magapangatubang sang kaso nga paglapas sa section 2, 5, 11 sa Article 2 sang RA 9165 ukon Comprehensive Dangerous Drugs Act of 2002.
