Gin-athag ni Bacolod City Vice Mayor El Cid Familiaran nga wala sang kamatuoran ang naglapta nga balita nga may yara sang napatay bangud sa coronavirus disease 2019 (COVID-19) sa ciudad sang Bacolod.
Sa interview sang Bombo Radyo Bacolod kay Familiaran, ginpahayag sini nga ila na ginapa-verify ang nasambit nga balita nagikan sa Office of the Civil Defense (OCD).
Suno diri, posible nga nagsala lang ang mga ini.
Ginkumpirmar man sini nga recovering na ang una nga pasyente nga nagpositibo sa COVID-19 sa Bacolod.
Apang nakatalana ini nga itest liwat kag kun magnegatibo, mahimo na ini nga idischarge.
Nagpangabay man ang bise alkalde nga likawan ang pag-pakamalaot sa mga pasyente.
Nagpangabay man ini sa publiko nga indi magbinutig sa matuod-tuod nga nabatyagan nahanungod sa ikaayong lawas agud mahatagan gilayon sang nagakaigo nga pagbulong.
Sa karon, nagapabilin sa gihapon sa 10 ang persons under investigation (PUIs) sa Bacolod.
