Ginpahayag ni Vice Mayor El Cid Familiaran nga siya ang nagperma sang kontrata in behalf kay Mayor Alfredo Benitez agud masuguran na sang contractor ang renovation sang Bacolod City Mayor’s Office samtang yara sa luwas sang pungsod.
Sa interview sang Bombo Radyo kay Familiaran, duha ka adlaw matapos nagpadulong sa Japan si Benitez kaupod si President Ferdinand Marcos Jr., ginrequest ini sang Secretary to the Mayor nga magperma sang kontrata bangud ginadalian ang repair agud makasugod ang contractor.
Suno sa iya, nagperma ini in behalf ni Benitez sang balor nga P15.8 million.
Nalakip sa total renovation sang kabug-usan nga Mayor’s Office ang receiving area, conference, Office of the Secretary to the Mayor kag Mayor’s Office.
Nadala man diri ang renovation humalin sa salog, tiles, carpet, dingding kag ceiling.
May yara man sang opisina para sa executive assistant kag may igadugang nga isa pa gid ka conference room.
Suno sa bise-alkalde, wala ini nakahibalo sang dugang nga detalye tuhoy sa renovation kag wala man ini nalakip sa diskusyunan bangud ang iya pagperma ang ministerial lamang.
Wala man ini sang kahilabtanan sa kun ano ang pagagamiton nga materyales kag iban pa nga detalye bangud indi man siya kabahin sang requesting party kag wala man sang may gin-aprubahan nga budget sa Sangguniang Panlungsod.
Suno kay Familiaran, yara na kay Benitez kun paano sini gastuhon ang budget para sa 2023 kag iimplementar ang mga programa para sa ciudad.
