Ginpa-athag sang Resident Volcanologist sang Kanlaon Volcano Observatory nga ang volcanic earthquakes nga nabatyagan nagapatimaan sa pagsaka sang magma sa Kanlaon Volcano.
May yara sang duha ka asod-asod nga linog nga nabatyagan sa La Carlota City, Negros Occidental kaina sang kaagahon.
Una nga nabatyagan ang magnitude 3.6 nga linog alas- 3:28 kaina sang kaagahon nga ginsundan sang magnitude 3.9 nga linog alas 04:06 sang kaagahon.
Sa interview sang Bombo Radyo Bacolod kay Engineer Mari Andylene Quintia, 44 ka volcanic earthquakes ang narekord sang Philippine Institute of Volcanology and Seismology (PHIVOLCS) nga naga-range sa 0.6 tubtob 3.9 magnitude.
Suno diri, ang linog nabatyagan sa La Carlota City kag sa Bago City ilabi na sa Barangay Ilijan kag Mailom bangod ang epicenter yara sa western side sang Kanlaon Volcano.
Pahayag ni Quintia, volcanic ang origin sang linog kag ini patimaan nga nagasaka ang magma sa baba sang bulkan.
