Umpisahan subong nga adlaw ang boluntaryo nga pagguba sang 32 ka mga pamilya sang ila nga balay sa Purok Lampirong, Barangay 2, Bacolod City, ukon sa palibot sang Mambuloc Creek, agud nga sila ang makasaylo na sa relocation site.
Suno kay Bacolod City Legal Officer Atty. Romeo Carlos Ting Jr., kahapon kuntani umpisahan ang voluntary demolition sang mga pumuluyo apang ini ang ginpaiway bangod sa pag-ulan.
Gintanyagan ang mga residente sang relocation sa Purok Arao, Barangay Vista Alegre bangod makapatigayon ang Department of Public Works and Highways (DPWH) sang dredging kag widening sa Mambuloc Creek.
Ang pagpalapad kag pagpadalom sa Mambuloc Creek ang patigayunon agud nga masolusyunan ang masami nga pagbaha sa pila ka bahin sang syudad.
Suno kay Ting, makabaton sang P10,000 ang apektado nga residente nga magaguba sang ila kaugalingon nga balay.
Apang paathag sang City Legal Officer nga indi tanan sa 32 ka pumuluyo ang makabaton sang P10,000 bangod may iban sa ila nga disqualified bangod renters lamang sa lugar samtang may iban naman nga una na nga na-awardan sang relocation apang nagbalik lang sa Mambuloc Creek.
Una naman nga natsekyar sang mga residente ang relocation site nga ila pagasayluhan.
Nakahanda naman nga magprovide sang salakyan ang city government kag ang DPWH para sa pagsaylo sang mga kagamitan sang mga informal settlers.
