Nag-umpisa na ang voter’s registration sang Commission on Election (COMELEC) – Bacolod para sa 2025 midterm election.
Temprano pa kaina sang aga, sa pagtsekyar sang Bombo News Team, madamo na sang nagpila agud una nga makaparehistro.
Sa interview sang Bombo Radyo Bacolod kay Bacolod City Election Officer Atty Katrina Trinio Caña, nakaandan na nga sa una nga senemana sang voter’s registration, madamo sang mga nagaparehistro kasubong man kun nagahilapit nalang ang deadline.
Samtang nagadyutay naman ang nagaparehistro sa tunga-tunga sang registration period.
Ang registration period ang magalawig tubtob sa Setyembre samtang ang Comelec – Bacolod ang sarang naman nga makacater sang 250 tubtob 300 ka voter’s registration kada adlaw.
Suno kay Caña, Lunes asta Huwebes, sa Comelec Office patigayunon ang registration samtang kun Biyernes Sabado magapatigayon naman sang satellite registration sa nagkalainlain nga Barangay.
Subong nga Pebrero 17, ang satellite registration ang patigayunon sa Barangay Pahanocoy.
May-ara man sang Registration Anywhere Program sa mall, Lunes tubtob Biyernes kun sa diin ang mga nagatrabaho sa ciudad sang Bacolod nga botante sa nagkalainlain nga banwa kag ciudad sa Negros Occidental.
Sa Pebrero 23, may patigayunon naman nga registration fair sa SM City Bacolod kun sa diin magapatigayon sang voter’s registration ang nagkalainlain nga Comelec offices sa Negros Occidental.
Panawagan naman ni Caña sa mga magaparehistro nga Bacolodnon nga ipreparar na ang mga kinahanglan nga dokumento kaangay sang valid IDs, photocopy sang mga IDs ukon mga birth certificate kag marriage contract kun kinahanglan.
