Magapadayon sa Enero 5, 2026 ang voters’ registration.
Sa interview sang Bombo Radyo Bacolod kay COMELEC Negros Island Region Director Atty Lionel Castillo, ang voters’ registration ang tubtob nalang subong nga adlaw December 23, 2025, kag magabalik sila sa January 5, 2026.
Suno kay Castillo dapat magbutang gid sang sattellite registration sa eskwelahan kag sa mga mall sa Bacolod kag Dumaguete City bangud tuman ka hina ang registration kun magahulat lamang ang mga ini sa opisina.
Nagpanawagan si Castillo sa luyag nga magparehistro nga magfollow sa facebook page sang COMELEC sa ila nga lugar agud nga mahibaluan ang schedule sang voters satellite registration.
Nagalaom man ini nga indi na paghulaton sang voters applicants nga magparehistro duha ka semana antes magtakop ang voters registration.
Nagdangat sa 8,194 ka voters applicants ang nakarehistro para sa week 8 ukon December 8 tubtob December 13 nga Comelec registration output.
Sa data sang Comelec Negros Island Region pinakadamo ang nagparehistro sa Negros Occidental nga may may yara sang 5,895 ka applicants; Negros Oriental nga may 2,193 samtang 106naman halin sa Siquijor.
Samtang, sa Register Anywhere Program, sa Bacolod City, may yara sa 22.
Para naman sa Week 1 tubtob Week 9 nga data sang voters registration nga ginpagwa sang COMMELEC, nagdangat na sa 52, 375 ang nagparehistro, 35,538 diri ang sa Negros Occidental; 16,076 ang sa Negros Oriental kag 761 ang sa Siquijor.
