Ginakabig sang Philippine Drug Enforcement Agency Region 6 nga dako nga development ang pagbaton ni Vice President Leni Robredo sang appointment bilang co-chair sang Inter-Agency Committee on Anti-Illegal Drugs ukon (ICAD).
Sa interview sang Bombo Radyo kay PDEA Region 6 Director Alex Tablate, dako ang mabulig sang vice president sa operasyon sang Inter-Agency Committee on Anti-Illegal Drugs bangod sa mga bag-o nga initiatives kag suhestyon nga mahatag sini sa ahensya.
Nagalaom man sila sang madamo nga recommendation halin kay Robredo kag handa man ang ahensya nga suportahan ang bise presidente.
Santo sa rekord, may yara na sang kapin 7.5 billion nga balor sang droga nga nakumpiskar nationwide halin sa bulan sang Enero tubtob Oktubre 2019 kag dako gid diperensya sini kun ipaanggid sang nagligad nga tinuig.
Aminado si Tablate nga dapat gid tutukan ang problema sa illegal nga droga bangud indi lang ang pungsod Pilipinas ang nagapangatubang sini.
Ginahimu-an naman sang lihok sang PNP, BJMP kag Bureau of Corrections suno sa iya agud matapna ang madata nga transaksyon sang illegal nga droga sa New Bilibid Prison.
Suportado naman sang isa ka political analyst ang pagbaton ni Vice President Leni Robredo sang designation bilang co-chair sang Inter-Agency Committee on Anti-Illegal Drugs ukon (ICAD).
Sa interview sang Bombo Radyo Bacolod kay Prof. Tony La Viña sang University of the Philippines (UP) Diliman – College of Law, ginpahayag sini nga duty sang kada pumuluyo sang Pilipinas ang pagbulig sa pagtapna sang operasyon sang illegal nga droga.
Suno kay La Viña, nagakadapat lamang nga hatagan sang trabaho ang bise presidente.
Si Robredo suno sa iya ang labing-una nga bise presidente nga wala gintugyanan sang trabaho sa madugay nga panahon.
Suno diri, apisar magkatuhay ang political party, kinahanglanon sang presidente kag bise presidente nga magbuligay sa pagsolbar sang mga problema nga ginapangatubang sang pungsod.
Apisar nga politically risky ang nangin decision ni Robredo, saludo sa gihapon ang profesor sa iya kag ini man ang kahigayunan sang vice president nga ipatuman ang iya suhestyon para sa kampanya kontra illegal nga droga.
Aminado man ang political analyst nga may yara sang kinahanglan nga ligwaton sa stratehiya sang gobyerno bangud mismo si Presidente Duterte ang nag-ako nga ini ang failure.
