Nagpadulong si Vice President Leni Robredo subong nga hapon sa Church of Gesu sa Ateneo de Manila University agud magduaw sa iya ally nga si anay Presidente Benigno “Noynoy” Aquino III, nga napatay sang kahapon.
Alas 3:00 kaina sang hapon, nag-abot si Robredo sa Ateneo kaupod ang mga anak sini nga sanday Tricia kag Aika.
Kahapon, isa man si Robredo sa mga political personalities nga nauna mag-abot sa Heritage Memorial Park sa Taguig City agud makig-unong sa nalisdan nga pamilya.
Nakita man sa Church of Gesu sanday Executive Secretary Salvador Medialdea, Senator Aquilino “Koko” Pimentel III, anay Senator Manuel “Mar” Roxas III, kag newly-installed Manila Archbishop Jose Cardinal Advincula.
Ang publiko ang ginapahanugutan nga magbisita sa abo ni Aquino sa Church of Gesu humalin alas 10:00 kaina sang aga tubtob alas 10:00 karun sa gab-I, Hunyo 25.
May yara man sang patigayunon nga santos nga misa alas 05:00 sang hapon kag iban nga misa alas 8:00 sang gab-I subong nga adlaw.
Buwas, Sabado may yara sang patigayunon nga funeral mass sa Church of Gesu alas 10:00 sa aga nga pangunahan ni Archbishop Socrates Villegas.
Matapos ang funeral mass, ang bangkay sang anay presidente ang igalubong sa Manila Memorial Park sa Quezon City, kun sa diin hatagan man ini sag arrival honors kag gun salute.
Si Aquino ang ika 15 nga presidente sang Pilipinas.
Antes ini mag-uyat sang highest elected position sa Pilipinas sang 2010, nagserbe si Aquino sa Legislative department.
Ginrepresentar sini ang second district sang Tarlac sa House of Representatives humalin sang 1998 tubtob 2007, matapos nga nagpadalagan bilang senador kag nagserbisyo sa Senado humalin sang 2007 tubtob 2010.
