Gindayaw ni Vice President Sara Duterte ang nangin madinalag-on nga panggobyerno ni President Ferdinand “Bongbong” Marcos Jr. makaligad ang isa ka tuig sini nga pagpungko bilang chief executive.
Sa statement, ginpahayag ni Vice President Duterte nga sa sulod sang isa ka tuig, napamatud-an ni Presidente Marcos nga determinado ang administrasyon sa pagtuman sang iya nga mga promisa sang eleksyon.
Dugang pa sini nga siya ang malipayon nga nangin kabahin sang administrasyon nga nagatutok sa pagpabaskog pa sang pungsod.
Ini pinaagi sa agresibo nga pagpabaskog sang ekonomiya, paghatag sang nagakaigo nga trabaho kag palangabuhian, pagsabat sa problema sa kapigaduhon, paghatag sang suporta sa mga sektor kaangay sang mangingisda, mangunguma kag mga mamumugon, pagtukod sang mga importante nga imprastraktura, pagpaayo sa kalidad sang edukasyon kag ikaayong lawas sang mga Pilipino, kag pagpabaskog pa sang relasyon sang Pilipinas sa iban nga mga pungsod.
Madumduman nga si Presidente Marcos ang gin-inagurahan bilang Presidente sang Pilipinas sang Hunyo 30, 2022 sa National Museum, samtang running mate naman sini sa 2022 elections si Vice Presidente Duterte.
Pahayag sang Bise Presidente nga ginapadayun ni Presidente Marcos ang mga pagbag-o nga gin-umpisahan sang nakaligad nga administrasyon sa pagpamuno sang iya amay, nga si former President Rodrigo Duterte.
Suno diri, makita sang tanan ang kapisan kag pagtinguha sang Presidente kag ini ang nagtanyag man sang mga panibag-o nga mga programa kag proyekto agud nga mas mangin maayo pa ang kahimtangan sa kabuhi sang mga Pilipino.
