Gin-abisohan si Vice President Sara Duterte nga indi na magtambong pa sa Senate Impeachment Court.
Suno kay anay Ateneo School of Government (ASOG) dean, Atty. Tony La Viña, dapat likawan sang bise presidente nga mag-atubang sa trial bangud isa ini ka risgo para sa iya nga defense team.
Suno diri, posible nga indi malikawan ang anuman nga emosyunal nga reaksyon ukon mabudlayan nga mapaathag ukon ma-counter ang anuman nga ebidensya.
Suno kay La Viña, kun ini ang matabo, mahimo magpamalabag lamang si Duterte sa iya nga defense team.
Ginbalikan sang batikan nga abogado ang natabo sa trial ni anay Supreme Court Chief Justice Renato Corona sa diin nagtambong ang anay Chiej Justice sa korte.
Suno diri, ini ang nangin sala nga tikang sang anay mahistrado, bangud sa pihak sang mga paandam sang iya mga abogado kag adviser, ginpili gihapon sini nga mag-atubang sa nasambit nga trial.
Kun balikan ang nangin appearance ni Corona sa korte, wala sini napunggan nga maghibi kag nag-walkout tubtob nga nag-eksperyensya ini sang medical emergency antes pa makagwa sa Senate building.
Pahayag ni La Viña, ang anuman nga breakdown sa impeachment court ang sigurado nga makaapekto sa imahe ni Duterte.
