Nagpanindugan si Vice President Sara Duterte nga indi ini maghalin sa pwesto matapos pila ka mga mamalidha ang nagsuhestiyon nga siya ang magresign bangud sa pagpamalibad sini nga personal nga depensahan ang 2025 budget sang iya opisina.
Madumduman nga ginpahayag ni Ako Bicol party-list Rep. Raul Angelo Bongalon nga daw kaangay nga indi interesado si Duterte sa iya duties kag functions bilang bise-presidente kag kun pwede magbiya na lamang sa pwesto.
Wala naman sang pormal nga panawagan para sa bise-presidente nga magresgn.
Suno kay Duterte, indi ini magsabat sa “Young Guns” bangud kinahanglan sini nga magsabat sa 32 million nga nagboto sa iya.
Indi man ini magbiya sa pwesto bangud siya ang ginbutang dira sang ga tawo nga nagapati nga siya ang magatrabaho para sa pungsod.
Ang “Young Guns” amu ang grupo sang mga miyembro sang Kongreso nga naga-edad 40 anyos panubo kun sa diin kalabana sa mga ini ang yara sa first terms bilang mga kongresista.
Apang ginpahayag ni Duterte nga magatambong lamang ini sa budget deliberations sang Senado.
