Ginkumpirmar sang secretary general sang General Alliance of Workers Associations (GAWA), nga nabaton na sang Regional Wage Board ang P355 wage increase petition nga ginpasa sang Fishta Union of Employees for Reforms Through Solidarity Actions (Fuersa-Super).
Nahibaluan nga ginpahayag ni Department of Labor and Employment (DOLE)-Western Visayas Director Atty Sixto Rodriguez. Jr. nga ang pagbaton sang wage increase petition ang una nga tikang para sa posible nga wage hike sa rehiyon.
Sa interview sang Bombo Radyo Bacolod kay Wennie Sancho, nabaton na sang wage board ang petition sa tion sang zoom meeting kahapon.
Suno kay Sancho, ang proseso sa pagkay-o sang minimum wage ang paga-umpisahan na nga pagalakipan sang public hearings kag consultations.
Suno kay Sancho ang FUERSA-SUPER ang nagahingyo sang saka sa sweldo nga P355 kada adlaw ukon kabug-usan nga P750 kada adlaw para sa mga mamumugon sa Western Visayas.
Ang una nga consultation ang patigayunon sa syudad sang Bacolod sa Abril 8, pagasundan sang patigayunon sa Abril 11 sa Iloilo, Guimaras, Capiz kag Antique samtang Abril 12 naman sa Aklan.
Ang wage deliberation sang Regional Wage Board ang patigayunon sa Mayo 22 kag 23.
Nagalaom man si Sancho nga sa Mayo 2, may-ara na sang issuance sang wage order apang indi pa matumod kun pila ang balor kag mahibaluan nalang kun madesisyunan na kag matapos na ang deliberasyon.
Ginpahayag man sini nga ang rollback sa presyo sang produktong petrolyo ang wala sang kaangtanan sa petition sang mga mamumugon para sa wage increase, bangud kun magroll back sa presyo sang gatong wala man naganubo ang presyo sang basic goods kag services kaangay sang nagakatabo sang nakaligad.
Ginalauman naman nga magapamatok ang business sector sa wage increase apang ang main goal sa pagduso sang pagpasaka sang sweldo amo ang pagrestore sang purchasing power sang mga mamumugon sa Region 6 nga nag-antos sa tunga sang pandemic economic recession.
