Ginapanawagan sang General Alliance of Workers Association (GAWA) sa Regional Wage Board Western Visayas nga suguran na ang talakayan kag public consultation para sa wage increase sa rehiyon.
Sa interview sang Bombo Radyo Bacolod kay GAWA Secretary General Wennie Sancho, matapos na ang one-year bar sa pagpatuman sang wage order sa Nobyembre 19.
Santo sa Labor Code, kinahanglan nga makapatuman na sang panibag-o nga wage increase.
Dugang pa sini nga may nasumiter naman nga wage hike petition nga P250.
Bangod malapit nalang ang Nobyembre, suno kay Sancho dapat nagahulag na ang Regional Wage Board kag nagapatigayon na sang mga public consultation kag public hearing.
Aminado si Sancho nga malayo nga mapatuman ang P250 nga saka sa daily minimum wage, bangod sa nadumduman sini, ang P85 nga wala napatuman sa National Capital Region na ang pinakamataas nga napasar nga wage increase.
Panawagan man sini sa duha ka labor representative sa Regional Wage Board, nga tinguhaan nga mapanindugan ang mas mataas nga saka sa sweldo.
Pahanumdom niya nga nagpanaog na sa 72 centavos ang equivalent sang kada piso, kag tuman nagid ang pagsarurot sang purchasing power sang pumuluyo.
Pahayag sini nga sa pagrestore pa lamang sang purchasing power, masobra P200 na ang kinahanglan nga madugang sa sweldo, kag ini ang indi pa makabig nga wage increase.
Pahanumdom sini sa management nga partner nila ang mga empleyado, kag bilang partners, dapat ihatag man ang matawag living wage, nga sarang makabuhi sang pamilya.
