Nagadangat pa sa P202.8 million ang balor sang Health Emergency Allowance nga wala pa mahatag sa mga health workers sa tion sang COVID-19 pandemic sa probinsya sang Negros Occidental.
Sa pahayag ni Department of Health Undersecretary Dra. Mary Ann Maestral, ang tanan nga listahan sang mga healthcare workers nga nagserbe nga fronliners sang pandemic nationwide ang ginapasa nila sa DOH Central Office.
Sila na ang nagaproseso sa pagpagwa sang pondo kag ginadownload sa DOH Regional Offices.
Paathag ni Maestral nga may lain nga DOH Undersecretary nga assigned sa nasambitan nga purpose.
Ang wala pa mabayaran nga HEA ang gikan sa Agosto tubtob Disyembre 2021 kag Enero tubtob Hulyo 2023.
Nakadepende naman sa risk level ang mabatun nga HEA.
Madumduman nga P3,000 ang mabatun nga HEA sang mga yara sa low risk category kada bulan, P6,000 sa medium risk samtang P9,000 naman ang sa high risk.
Paathag ni Maestral nga nasumiter na nila ang listahan sang mga dapat makabatun, kag indi na ini makasabat kun san-o marelease bangod ini ang masabat lamang sang DOH Central Office.
