Pito ka balay ang nahalitan sang sunog nga nagluntad sa Purok Kasilingan, Brgy Tangub, ciudad sang Bacolod, kapin alas- 10:00 kaina sang aga.
Nagdangat sa first alarm ang sunog kun sa diin apat ka balay ang totally damaged kag tatlo ang partially damaged.
Sa interview sang Bombo Radyo kay Edna Sarmento, kaina sang aga naglakat ini kag nakabaton sang tawag nga nasunog ang ila balay.
Dali-dali ini nga nagpauli kag pag-abot, iya na lamang naabtan nga napalong na ang kalayo.
Suno diri, nadumduman sini nga iya ginpatay ang electric fan nga iya man gingamit.
Ini ang iya gid ginsiguro nga makakas sa saksakan bangod nga guba na ang off button sini.
Apang, indi naman sigurado si Sarmento kun bala napatay ang iban nga electric fan sa sulod sang ila balay.
Suno diri, sa ila nga balay, ginabanta nga P10,000 ang balor sang halit sang sunog.
Iban sa mga balay nahalitan ang ginapanag-iyahan sang iloy kag utod ni Sarmento kag nalakip man sa nasunogan ang tyangge sang kaingod nila.
