Gin-athag sang alkalde sa ciudad sang Bacolod ang rasun sa pagrelieve kay anay Office of the Building Official Head Engr. Isidro Sun Jr.
Madumduman nga ginbulos bilang office in charge sa opisina si Engr. Amy Tentia.
Sa interview kay Bacolod City Mayor Alfredo “Albee” Benitez, madugay na sini nga derektiba nga amat-amat na nga magshift sa contactless ukon online transactions ang mga departamento.
Ini agud malikawan ang mga issue sa departamento, apang wala gid ini sang nakita nga paghulag sa OBO.
Pahanumdom sini nga isa sa masami nga ginareklamo ang delay nga paghatag sang building permits.
Aminado ini nga may iban nga departamento nga mahinay man ang paghulag padulong sa online transactions, apang bisan paano ang mga ini ang may hinimuan.
Kaangay lamang sang paghulog na lamang sang application form, kag kasunod sini online na ang mangin transaksyon nga mahimo matrack kun tubtob sa diin na ang proseso.
Pinaagi sini malikawan man ang mga anomalya, kaangay sang dugay-dugay nga pagpakigkita sang mga opisyal sa kliyente nga ginatunaan sang kurapsyon.
Sa pagshift sa online transactions, maga-atubang na lamang ang mga empleyado sa kliyente sa tion sang mga physical operations kaangay sang building inspection.
Aminado si Benitez nga may pipila nga wala nakahibalo maggamit sang online applications, apang indi ini rasun nga indi maglagaw sa modernization sang panahon nga sa karun nagatiyog na sa teknolohiya.
Target sini nga mangin transparent, convenient kag effecient ang government transactions, nga nagakadapat sa isa ka Super City.
Sa karun, nagapabilin gihapon sa OBO si Sun, apang nakadepende na kay Tentia kun sa diin ini ibutang nga pwesto.
