BACOLOD CITY — Wala nasunod nga mga safety guidelines ang gintunaan sang kamatayon sang duha ka construction workers nga nahulog sa narusdak nga bahin sang ginatukod nga mall sa Dalan Gatuslao, ciudad sang Bacolod tinalikdan nga Noviembre 11 sang kaagahon.
Santo sa resulta sang imbestigasyon sang Department of Labor and Employment (DOLE) Negros Occidental, kumpleto man sang safety equipment ang nagakalamatay nga sanday Heracleo Abraham, 36-anyos, residente sang Purok 6, Sitio Magsungay, Brgy. Singcang-Airport, ciudad sang Bacolod; kag Dodie Boy Mallorca, 32-anyos sang Chamberry, Manapla.
Apang suno kay DOLE Negros Occidental head Mary Agnes Capigon, wala naangot sa hook ang full body nga harness sang mga biktima rason nga sila ang nahulog sang narusdak ang porsyon sang building nga ila ginabuhusan sang semento.
Suno kay Capigon, kun naangot kuntani ang harness sang mga biktima, nagkabit-kabit lang ang mga ini sang narusdak ang ila nga ginabuhusan.
Magluwas nga wala naangot ang harness sang mga nagkalamatay, mahuyang man ang mga scaffolding nga ila ginatindugan.
Apang antes pa man ang aksidente suno kay Capigon, makapila ka beses nga nagbrown-out gani saka-panaog ang mga trabahador kag posible nga nagkumpyansa ang mga biktima rason nga wala na nila na-angut sang husto ang ila mga body harness.
Sa karun, epektibo pa ang work stoppage order sa porsyon sang construction nga narusdak kag ipadala pa sa DOLE regional office ang resulta sang talatapan ni Capigon kag diri pa lantawon ang hingyo sang construction company nga batakan na ang stoppage order.
Matapos ang aksidente sa ginatukod nga mall sa Dalan Gatuslao ciudad sang Bacolod nga ginkamatay sang duha ka construction workers naghatag sang panugyan ang Department of Labor and Employment (DOLE) Negros Occidental sa iban pa nga construction sites sa palibot sang ciudad.
Suno kay Capigon, dapat nga siguruhon pirmi sang mga construction company ang safety sang ila mga trabahador partikular nga naga inulhot lang subong ang mga constructions sa palibot sang Bacolod.
Dugang pa sini, dapat nga makapasar gid sa Construction Safety and Health Program ang tagsa ka construction companies.
