Hulaton sang mga opisyal sang Barangay Alijis diri sa ciudad sang Bacolod ang resulta sang mass testing antes magdesisyon kun ipaidalom sa home quarantine ukon facility quarantine ang mga indibidwal nga indi halin sa anuman nga sahi sang quarantine antes nagpakuha sang swab subong nga adlaw.
Ang mass testing sa Barangay Alijis ang ginpatigayon ala-1:00 tubtub alas-3:00 subong nga hapon sa gym sang Regent Pearl Homes.
Sa interview sang Bombo Radyo kay Punong Barangay Deogracias Dela Vega, mga Barangay Health Emergency and Response Team (BHERTS) kag Barangay Health Workers (BHW) ang nag-assist sa mga residente nga nagpakuha sang swab.
Wala pa ini sang may nabaton nga instruction halin sa City Health Office kun mapaidalom sa home ukon facility quarantine ang mga residente nga nagpaswab samtang nagahulat sang resulta, magluwas sa nagapaidalom na nga daan sa home quarantine.
Suno kay Dela Vega, ang tanan nga pamilya sang nagpositibo sa COVID-19 ang ipaidalom sa swab testing.
Ginpahanumdom man sang Punong Barangay sa mga residente sang Alijis nga ang swab testing ang protection sa ila.
Nagpanawagan man ini sa mga pumuluyo nga dapat magbuligay ang tanan agud nga mangin madinalag-on ang pagpakigbato sa COVID-19.
Ginaduso man sang Liga ng mga Barangay nga hatagan sang syudad sang hazard pay ang mga BHERTS kag frontliners.
