Ginapakamaayo sang Secretary General sang General Alliance of Workers Association (GAWA) ang pagpatuman sang Walang Gutom Program sang Department of Social Welfare and Development (DSWD).
Kaangot sa programa, ang ahensya ang magahatag sang Electronic Benefit Transfer (EBT) cards sa mga matumod nga benepisyaryo nga amo ang pagasudlan sang balor P3,000 nga cash assistance nga sarang magamit sa mga partner retail stores ukon Kadiwa ng Pangulo.
Ini ang ihatag sa mga low income households sa tinutuyo nga mapabangon gikan sa kapigaduhon ang mga pumuluyo.
Sa interview sang Bombo Radyo Bacolod kay Wennie Sancho, ang poverty alleviation program ang kabahin sa tinutuyo sang gobyerno nga ma-implementar ang social justice.
Ini ang nagaseguro nga mahatagan sang pag-ulikid kag mapaboran sang layi ang mga wala nagakatalupangdan kag mapasanyog ang pagpangabuhi sang mga less previledged.
Apang panugyan ni Sancho nga mas maayo kun ini ang lakipan sang educational component kag indi lamang dole out, agud nga ang mga benepisyaryo ang indi na lamang magsalig sa gobyerno.
Maayo man suno diri nga ginpaagi sa card ang paghatag sang ayuda kag indi gikan sa kamot sang politiko, apang ang dapat na lamang matul-id nga nagakadapat gid ang mahatagan sang assistance.
Panugyan man sini nga dapat may Impact Evaluation agud matumod ang ikasarang sang programa nga mapahagan-hagan ang problema sa kapigaduhon sa Pilipinas.
Aminado si Sancho nga ang bulig pinansyal ang makapiyan-piyan sa pag-antos sang mga pigado, apang pahanumdom sini nga isa sa dapat mahatagan sang suporta sang gobyerno amo ang sektor sang agrikultura.
Bangod ang kakulang sang suporta amo ang ginhalinan sang kapigaduhon, kun sa diin sa karun magluwas sa P29 nga kada kilo nga ginatugyan sang gobyerno, mahal gihapon ang presyo sang bugas nga mabakal sang kadam-an.
