Nakafile na sang kaso ang walo sa kapin 50 ka mga biktima sang scam batok kay Sangguniang Bayan Member Donato “Natnat” Dumaguit kag Mary Jun Delos Santos nga amo ang nagpasalig nga magpasulod sa mga biktma sa Philippine National Police sa mahapos nga proseso basta sila magabayad sang kapin P200,000 tubtob P270,000.
Sa interview sang Bombo Radyo kay Police Captain Judesses Catalogo, tagpamaba sang Negros Occidental Police Provincial Office, nakafile na sang kaso ang walo ka mga complainant samtang padayon pa ang pagproseso sa dugang pa gid nga pagfile sang kaso basta kumpleto ang dokumento kag may yara sang ebidensya nga mapakita ang mga complainant.
Suno diri, Large Scale Estafa ang nafile nga kaso bangod dako nga kantidad sang kwarta ang imbulbado.
Sa karun, duha pa lamang ang gina-alegar nga suspek nga sanday Dumaguit kag Delos Santos apang padayon pa ang imbestigasyon sa posible nga mga imbolbado sa pagpangscam kun sa diin ginalantaw nga may koordinasyon diri ang pulis mismo.
