Arestado ang walo ka mga persona sa ginpatigayon nga buybust operation sang Philippine Drug Enforcement Agency – Special Enforcement Unit sa Vendor’s Plaza sa Barangay 12, Bacolod City kahapon, alas 2:00 sang hapon.
Sa interview sang Bombo Radyo Bacolod sa team leader sang PDEA-SET nga si Agent Bambo, ginpahayag sini nga ang mga nadakpan ang ginkilala nga sanday Joshua Cagalcal, 25 anyos; Jayhan Mission, 39 anyos; Roy Ageña, 45 anyos; Hermel Taghoy, 35 anyos; Reynard Villamor, 33 anyos; Brian Alison, 36 anyos; Danny Rodriquez, 29 anyos; kag ang ila subject person nga Jovie Bermudes, 35 anyos.
Suno kay Agent Bambo, may yara sila sang walk-in informant nga nagpahayag nga talamak ang pag-baligyaanay sang iligal nga druga sa amo nga lugar.
Nakabakal ang informant kag ang ila posuer buyer sang iligal nga droga kag gilayon man nga ginsulod sang iban pa nga mga operatiba ang.
Ila pa naabtan ang iban nga suspetsado nga naga-suyop sang shabu sa idalum sang tapangko sa sulod sang Vendor’s Plaza.
Suno kay Agent Bambo, ang dalum sang tapangko ukon ang gina-plastaran kag ginabaligyaan sang isda ang ginhimo nila nga suluyopan kag ilistaran kun sa diin makabig na ini nga drug den kag ang maintainer diri amo si Bermudes.
Ginpahayag sang team leader nga sa ila pagsulod sa lugar, madamo sang mga open sachets sang shabu ang nagalinapta sa salog nga may yara pa sang traces.
Nakuha naman sa paghinakop sang mga nadakpan ang pito tanan nga sachets sang suspected shabu nga may kabug-aton nga 10 ka gramos kag may balor nga P68,000.
Sa interview naman kay Punong Barangay JR Alcantara, ila pagagub-on ang mga tapi, kag jalousie nga gintakod sa dalum sang tapangko sa diin gina-istaran kag ginhimo nga suluyopan.
Suno sa iya, ila naman napahibalo sa mga operatiba ang mga iligal nga aktibad sa lugar.
