Walo ka persona ang arestado sa buybust operation nga ginpatigayon sang PDEA Negros Occidental Office kag Bacolod City Police Station 2 sa Purok Sigay, Brgy. 2, Bacolod City, Negros Occidental.
Ginkilala ang mga arestado nga sanday Analyn Nacionales alyas An-An isa ka drug den maintainer, Alice Tanghal, Jackielou Marañanon, Mariane Javelosa, Peter Nacionales, Jurey Gersaba, Jomar Arocan, kag Ryo Tayag.
Nakuha sa paghinakop sang mga ini ang 12 grams suspected shabu kag ginabanta nagabalor sang P81,600 kag mga drug paraphernalia.
Sa interview sang Bombo Radyo Bacolod kay PDEA Negros Occidental Head Nicholas Gomez, nakabaton sila sang report nga madata ang pagbaligyaanay sang iligal nga droga sa balay sang drug maintainer sa nasambit nga lugar.
Nagpatigayon sila sang pila ka mga tracing kag surveillance operation kag navalidate sang tropa nga ginapatigayon ang iligal nga aktibidad sa alagyan lang mismo.
Suno sa PDEA Negros Occidental head, hayag ang pagpatigayon sang iligal nga aktibidad.
Suno kay Gomez, ila man natumod nga si Mariane Javelosa ang miyembro sang isa ka illegal drug group.
Ginpahayag man sini nga ang iban sa nadakpan ang drug surrenderer kag ang iban ang may kaso na.
Natalana nga ipasaka ang kaso batok sa mga suspetsado matapos maglapas sang Sections 5, 6, 7, 11, kag 12 sang Article II sang RA 9165 ukon Comprehensive Dangerous Drugs Act of 2002.
