Walo ka armado nga mga persona ang gina-alegar nagsunog sa isa ka balay sa Purok Himpod, Barangay Minoyan, Murcia, Negros Occidental.
Sa interview sang Bombo Radyo Bacolod kay Police Major Sherwin Fernandez, hepe sang Murcia Municipal Police Station ang balay ang ginapanag-iyahan ni alias Rey.
Sa panaysayon sang biktima ang iya hinablos ang una nga nakakita nga may walo ka persona nga nakapalibot sa balay gani gintawag sini si Rey.
Apang bangod armado ang mga ini, wala na nangisog magpakita ang tag-iya sang balay.
Nakita man nila mismo nga ginbasyahan sang gasolina sang isa ang iya balay, kag ginsindutan ang tela nga amo ang gingamit sa pagsunog sa balay.
Totally damaged ang balay, samtang wala naman narespondihan sang Bureau of Fire Protection – Murcia bangod hulungdon kag nabukid nga bahin na sang banwa ang ginluntaran sang sunog samtang ang kahalitan ang ginabanta yara sa balor P30,000 tubtob P40,000.
Sa imbestigasyon, ginalantaw sang biktima nga bangod sa gina-agawan nga duta ang rasun sa pagpanghalit, kag kilala man sini ang isa sa mga suspect.
Suno diri, siya ang may duta sa ulu-unhan sang balay nga ginatamnan sini sang tubo, utanon kag ornamental plants.
Si Rey kag pamilya sini ang temporaryo nga nagatinir sa Barangay, samtang sila ang naghingyo man sang police assistance sang ila gintsekyar ang nasunog nga balay kahapon.
Natalana naman nga ipaidalum sang BFP-Murcia sa cross questioning sanday Rey kag hinablos sini agud maseguro nga consistent kag parehas ang ila nga mga statement.
Sa karun at large pa ang walo sa mga suspect, apang desidido si Rey nga magpasaka sang kaso.
