Tuman ang kalipay sang pamilya sang walo ka centenarianans sa probinsya sang Negros Occidental kadungan sang ila pagbaton sang P100,000 nga financial assistance nagikan sa provincial government kahapon.
Kaupod ang pinuno sang Provincial Social Welfare and Development Office, mismo si Governor Eugenio Jose Lacson ang personal nga nagdul-ong sang P100,000 cold cash sa balaya sang mga centenarianans agud malikawan ang public gathering sa Kapitolyo.
Kalakip sa mga ginkadtuan sang gobernador ang mga ciudad sang Escalante, Sagay, Cadiz kag ang mga banwa sang Manapla kag EB Magalona.
Ang mga centenarianans nga nakabaton na amo sanday Adoracion Monido, Josefina Gonzaga, Encarnacion Alegado, Juan Diesma, Lilia Deocampo, Rosario Guintalaga-an, Marcela Lucareza, kag Nieves Concerman.
Sa interview sang Bombo Radyo kay Governor Lacson, ginpahayag sini nga may 22 pa ka mga identified centenarianans nga wala pa nahatagan.
Posible nga magapang-hatag sila liwat sa masunod nga semana.
Ang paghatag sang financial assistance ang santo sa Negros First Centenarian Ordinance kun sa diin ang mga residente nga nakalab-ot sa edad nga 100 ang magabaton sang one-time nga P100,000 kada bulan sang Nobyembre.
Magluwas sa cash, nagbaton man ang mga ini sang Certificate of Centenarian Award.
