Ginkumpirmar sang pinuno sang Commission on Elections (COMELEC) Bacolod nga may yara sang walo ka nagdugang sa mga kandidato nga natalana nga dagdagan sang showcause order bangud sa paglapas sa premature campaign subong nga adlaw, Oktubre 4.
Sa interview sang Bombo Radyo Bacolod kay Atty. Katrina Trinio Caña, nakabaton sang report si Negros Occidental Provincial Election Officer Atty. Ian Lee Ananoria gikan sa COMELEC head office sa Manila nga may yara sang walo ka mga nagdugang sa mga kandidato nga magapadalagan sa Barangay and Sangguniang Kabatan Elections (BSKE) 2023 sa ciudad sang Bacolod nga dagdagan sang showcause order.
Suno kay Caña, nalakip sa ginakonsiderar sang COMELEC nga paglapas sa premature campaigning ang mga posts sa social media magluwas sa mga pagpangtapik sang posters.
Suno sa Bacolod election officer, sa tion nga mabaton sang mga kandidato ang showcause order, hatagan ang mga ini sang tatlo ka adlaw agud makapasa man ang mga ini sang ila sabat sa nasambit nga task force.
Nakadepende naman sa task force against premature campaigning ukon sa legal department sang COMELEC ang recommendation sa disqualification sang isa ka kandidato nga ginreklamo.
Nagapanawagan man si Caña sa mga pumuluyo nga kun may reklamo dapat idocument, pirmahan kag ipasa sa COMELEC agud nga maforward sa task force against premature campaigning kag maverify agud mapadasig ang proseso kag mahimuan sang tikang, bangud ang pagpadala sang reklamo nga indi documented ang wala ginasapak.
Samtang gintalana naman sa Biyernes kag Sabado ang training sang electoral board members kalakip na ang supervisors sa eskwelahan sa ciudad sang Bacolod kag may yara sang weekdays sa masunod nga semana.
