Nagdangat na sa walo ka mga evacuation centers ang may-ara sang mga evacuees sa banwa sang Hinobaan matapos nga nangin madamol ang pag-ulan kaina sang aga.
Sa interview sang Bombo Radyo Bacolod kay Hinobaan Municipal Mayor Daph Anthony Reliqiuas, alas-4:00 tubtob alas-5:00 sang kaagahon sang magbunok ang ulan sa banwa nga gin-updan pa sang mabaskog nga hangin kag mga pagpangilat.
Nagdangat naman sa 915 ka pamilya ang mga gin-evacuate ukon masobra tres mil ka indibidwal gikan sa nanarisari nga barangay nga ginlakipan sang Barangay Alim nga nagdangat sa 513 ka pamilya ang nag-evacuate, kasubong man sa Barangay 1 ukon Poblacion, Bacuyangan, Po-ok, Bulwangan, Asia, Daug kag Sangke.
Suno sa alkalde sa paglibot nila sa mga suba sa mga flood prone areas kasunod sang pag-ulan, nakita sang mga ini nga nagasaka ang tubig.
Bangod sa makusog nga hangin, isa naman ka balay ang natumbahan sang lubi samtang tuman man kabaskog ang pagbalod sa coastal areas.
May-ara man sang magnitude 3.1 nga linog nabatyagan sa banwa sang Hinobaan kapin alas-9:00 sang gab-i.
Nagpadala naman ang Negros Occidental sang 400 ka mga foodpacks nga ginalakipan sang bugas kag mga canned goods nga ginpanagtag subong nga hapon.
Magluwas diri, may mga bulong man nga ginpadala kag ginapadulongan sang mga doktor ang walo ka mga evacuation centers agud matsekyar kun may mga residente nga nagalain ang pamatyag.
Paathag ni Reliqiuas nga humalin palang kahapon, may mga nauna na sila nga evacuees kag ginsabat na sang banwa ang ila mga pagkaon kag mga kinahanglan.
Suno sa alkalde, antes paman ang preemptive evacuation kahapon, ginpanawagan na sini sa mga mangingisda nga likawan ang pagpalawod, gani ginapasalamat sini nga nagkooperar ang tanan nga mga fisherfolks.
Magluwas diri, nakita man ang kooperasyon sang mga pumuluyo partikular na sang ginpanawagan ang preemptive evacuation bangod kalabanan sa mga ini ang nadudla na ilabi na nga madamo sang nahalitan bangod sa pagpamatok sa evacuation efforts sang maglalas ang bagyo Odette.
Sa pihak nga bahin, may-ara naman sang kapin 1,600 ka boxes sang food packs gikan sa Department of Social Welfare and Development (DSWD) nga ginalakipan sang anom ka kilo nga bugas kag mga canned goods apang ini ang indi pa mapanagtag bangod ginahulat pa ang go signal sang DSWD Region 6.
