Wala na sang kabuhi sang nasapwan ang walo ka mga ido kag isa ka kuring matapos ginpanghiluan sa Barangay Granada, Bacolod City.
Sa interview sang Bombo Radyo kay Lowella Marie Sanicas Quililan, Public Relations Officer sang Community Animal Rescue Efforts, Inc. (CARE) sa Bacolod City, Hunyo 14 sang may nagreklamo sa ila nga madamo sang mga nagkalatumba nga ido kag kuring sa dalan.
Pagkabwas nga adlaw, ila ginkadtuan ang area kag yara pa ang bangkay sang mga ido kag kuring gani ila ini ginpalubong.
Suno kay Quililan, makaluluoy ang sitwasyon sag mga sapat bangud ginpabay-an lang ang mga ini kag wala gid ginhimos ang lawas.
Nakig-angot ini sa mga home owners apang wala sila sang ideya sa insidente.
Suno sa public relations officer, sang tinalikdan nga tuig may nagluntad man nga kaangay nga hitabo sa nasambit nga lugar kun sa diin 20 ka mga ido ang napatay matapos man nga ginhiluan.
Suno sa iya, indi insakto nga ang mga pumuluyo ang maghimo sini bangud ini ang paglapas sa Animal Welfare Acts kag kun makahalit gid man ang mga kasapatan, ireport ukon iturn over ini sa Bacolod City Pound.
Nagpanugyan man ini sa mga tag-iya nga mangin responsable kag kun may mga ido, indi pagpalagawon sa dalanon.
