Walo tanan ka medical workers kag senior citizens nga barangay health workers sa ciudad sang Bacolod ang nabakunahan sang Astrazeneca COVID vaccine kadungan sang ceremonial inoculation para sa amo nga brand sa lobby sang Bacolod Government Center, Sabado sang aga.
Nahibaluan nga kahapon, nag-abot sa Bacolod ang 312 ka vials sang AstraZeneca vaccine.
Ang kada vial ang nagaunod sang 10 doses sang bakuna.
Suno kay Dr. Chris Sorongon, deputy for medical sang Emergency Operations Center sang Bacolod, 60 years old and above ang edad sang mga barangay health workers bangud ang Astrazeneca vaccine ang sarang matublok sa mga senior citizens, indi kaangay sang Sinovac vaccine.
Kalakip sa mga nagpatublok amo si Dr. Benjamin Gonzaga, staff sang Bacolod City Health Office; Dr. Ellie Cong, misis nga si Dr. Joyce Cong kag anak nga si Dr. Joseph Cong.
Ang mga barangay health workers naman nga ginbakunahan amo sanday Virginia Magbanua kag Annabelle Regatcho sang Barangay 1, Rufina Arseña sang Barangay 42, Celsa Landero sang Barangay Taculing, kag Suzette Ico sang Barangay 3.// Suno kay Sorongon, ginhanas ang mga BHWs agud nga maedukar ang mga residente tuhoy sa COVID-19 gani sila mismo ang living example nga wala sang dapat kahangaw-an sa bakuna.
Suno kay Virginia Magbanua, 69-anyos kag BHW sang Barangay 1, wala siya nakabatyag sang sakit sang gintublukan ini sang bakuna.
Iya man paathagan ang iya mister kag kabataan nga magpabakuna batok sa coronavirus.
Suno naman sa 68-anyos nga si Rufina Arseña sang Barangay 4, wala ini nahadlok nga magpabakuna bisan kahapon lang sila ginpahibalo angot diri.
Mismo si Arseña ang naghagad sa iya mga kaupod nga magpabakuna bangud pwede man lang sila makapaiway kun indi qualified nga bakunahan.
Si Arseña ang 33 anyos na nga BHW kag nagapasalamat ini sa amo nga trabaho bangud ang ila matun-an ang maapply niya sa pangabuhi.
Wala naman nakahibalo ang iya mister kag kabataan nga nagpatublok ini sang bakuna bangud kun siya ang maglisensya, sigurado nga indi ini pagpahanugutan.
May tatlo pa kuntani sa BHW nga gin-imbitar man para sa vaccination apang wala sila naqualify bangud mataas ang ila blood pressure.
