Gin-anunsyar sang pinuno sang Incident Management Team Task Force COVID-19 sa Negros Occidental nga sa 41 ka mga empleyado sang Transcom Bacolod nga nagpositibo sa coronavirus, walo diri ang mga residente sang probinsya.
Sa interview sang Bombo Radyo kay Dr. Zeaphard Caelian, ginpahayag sini nga sa walo ka mga empleyado, isa diri ang nagikan sa Cadiz; duha sa Silay; isa sa Victorias; isa sa Valladolid; duha sa Bago; kag isa sa EB Magalona.
Suno kay Caelian, yara na sila sa mga quarantine facilities ila tagsa ka mga local government unit magluwas lang sa taga Valladolid nga naka-isolate sa karun sa EB Magalona Healing Center.
Suno sa iya, ang tagsa na ka mga LGU naman ang nagapatigayon sang contact tracing.
Samtang aminado naman si Governor Eugenio Jose “Bong” Lacson nga nagakahangawa ini kun posible nga nakasalamuha sang mga nagpositibo nga empleyado ilabi na kun sila ang nagsakay sa pampubliko nga transportasyon.
Suno kay Lacson, nagakabalaka ini sa posibilidad nga nagsakay sa pampubliko sa salakyan ang mga empleyado kag nagalaom nga kuntani indi lang maglapta ang virus.
Nagapati man ang gobernador nga kontrolado sang ciudad sang Bacolod ang sitwasyon kag kun paano sila makig-angot sa nasambit nga kumpaniya.
Sa bahin sang Kapitolyo, suno sa iya, masami siya nga nagapahanumdum sa mga empleyado nga kun nagalain ang pamatyag, disiplinahon ang kaugalingon kag indi na lang anay magsulod sa trabaho.
