Nasapwan nga wala na sang kabuhi kag nagaka-agnas na ang walo ka tuig nga bata nga lalaki sa tunga sang kampo sa Sitio Omot, Barangay Santol banwa sang Binalbagan, sang Sabado sang hapon, Nobyembre 23.
Sa interview sang Bombo Radyo Bacolod kay Police Major Jun Ray Batadlan, hepe sang Binalbagan Municipal Police Station, ang Barangay Tanod ang nakakita sang bangkay sang bata kag ginpahibalo ang mga kapulisan.
Suno kay Batadlan, sang Biyernes, nagreport ang pamilya sang biktima nga tatlo ka adlaw na nga nadula ang ila bata.
Suno diri, sang Sabado, ginpadulungan sang mga kapulisan ang lugar agud nga magpatigayon sang imbestigasyon.
Samtang nagaimbestigar ang mga police ang mga tanod ang nagasige man pangita tubtob nga nasapwan ang bangkay sang bata nga nagakaagnas.
Sa karun ginahulat pa ang resulta sang postmortem examination nga ginpatigayon sa bangkay agud matumod kun ano ang kabangdanan sang kamatayon sini.
