Nagtaliwan naman ang walo ka tuig nga bata nga lalaki nga nakasalbar kuntani sa pagpangluthang sa Hacienda Ledesma, Barangay Matab-ang, Talisay City nga ginkamatay sang iya iloy kag magulang, Martes sang gab-i.
Si John David Española ang ginbawian sang kabuhi sa Corazon Locsin Montelibano Memorial Regional Hospital sang Miyerkules sang gab-i.
Sa interview sang Bombo Radyo Bacolod kay Police Lt. Abegael Donasco, Deputy Chief of Police sang Talisay City Police Station, alas 11:30 sang Miyerkules sang gab-i, ginbawian sang kabuhi si John David Española bangud sa naagom sang igo sang bala sa tiyan ka sa dughan.
Suno kay Donasco, wala pa sila sang mga persons of interest kag napadayon sa gihapon ang imbestigasyon sa kaso.
Madumduman nga dead on the spot ang iya iloy nga si Sherly Española, 50-anyos kag magulang sini nga si Jason, 28-anyos, matapos nga sila ang ginluthang samtang sakay sa motorsiklo kag pauli na kuntani gikan sa pagpamakal sa city proper.
Si John David pa kuntani ang ginalauman nga makatudlo sang suspek nga nagluthang sa ila nga mag-iloy.
Una naman nga ginapahayag nga daan nga hiligut-anon ang isa sa ginalantaw nga motibo sa pagtiro sa mga biktima.
