Patay ang isa ka wanted person matapos ginaalegar nagbato sa mga pulis sang ini ang ginserbehan sang warrant of arrest sa Purok Baybayon, Barangay Banago, ciudad sang Bacolod kahapon sang hapon.
Sa interview sang Bombo Radyo Bacolod kay P/Capt. Richard Fajarito, station commander sang Bacolod City Police Station 3, ginserbehan sang mandamiento de aresto ang biktima nga si Fritz Diosanta angot sa kaso nga murder kag illegal gambling apang nagbato ini sa mga otoridad.
Suno diri, madugay na nila ginabantayan si Diosanta apang madanlog dakpon kag kahapon lang natiempuhan.
Ang biktima ang yara sa iya 20s kag anay drug surenderer sa lugar.
Gilayon naman nga ginkordon ang lugar kun sa diin natiruhan ang biktima kag padayon pa ang ginahimo nga imbestigasyon.
Suno naman kay Barangay Kagawad Jessie Bantigue, si Diosanta ang anay drug surenderer sa Barangay Banago kag ginkonsidera ini nga buyer/pusher, apat ka tuig na ang nakaligad.
Naulamid ini sa kaso nga murder sa Prk. Kawayan sang tinalikdan nga Nobyembre 2019, kag nag-abot ang warrant of arrest sini lamang nga Enero.
Makapila naman ini nga ginsulod sang mga operitiba apang madanlog ini kag indi madakpan.
Suno sa kagawad, kilala sini ang suspetsado kag malapit sa amay sini samtang may yara naman sang live-in partner kag may kabataan.
Medyo malayo naman ang balay sang suspetsado kag naglagsanay pa ang mga ini sa baybay tubtob nga makalab-ot sa mga pamalay kag nagsaka sa atop agud makapalagyo.
Nagsulod naman ini sa sliding window sang balay ni Chairman Delatore kag diri ini natiruhan kag nagtaliwan.
Suno naman sa mga pumuluyo, madamo sila sang nabatian nga linupok sumugod pa lamang sang ginalagas ini sang CIDG kag nahibaluan nga ang biktima ang una nga nagpalupok.
Nahibaluan nga madugay na ini nga engaged sa illegal nga droga apang on and off ang sahi sang operasyon sini.O
