Matapos ang malapit duha ka dekada, natigayon nga madakpan sang Talisay City Police Station ang isa ka wanted person sa Brgy. Zone 5, ciudad sang Talisay kahapon.
Sa impormasyon nga nakuha sang Bombo Radyo, arestado si Condrado Iglesias, 55 anyos kag residente sang nasambit nga lugar, bangud sa kaso nga illegal gambling ukon paglapas sa Presidential Decree 1602.
Nahibaluan nga sang Nobyembre 29, 2001 pa ini gin-issuehan sang warrant of arrest.
Ginrekomendahan si Iglesias sang P10,000 nga pyansa para sa iya temporaryo nga kahilwayan.
Sa karun, yara ini sa kustodiya sang Talisay City Police Station.
Samtang, dakop man ang top 2 most wanted person sang Silay City Police Station bangud sa kaso nga murder.
Si Melbert Sapio, 34 anyos kag residente sang Brgy. Guimbalaon, ciudad sang Silay ang natigayon nga madakpan sang mga kapulisan sa Felisa 2, Brgy. Lantad, Silay City.
Gin-issuehan ini sang warrant of arrest sang Disyembre 12, 2017 kag sa karun, nakahunong na sa nasambit nga estasyon.
