Ginapasiguro sang warden sang Negros Occidental District Jail (NODJ) nga hilway sa ila kustodiya ang pito ka mga lider sang progresibo nga grupo nga ginpasakaan sang kaso kasunod sang implementasyon sang search warrants sa opisina sang mga ini sa ciudad sang Bacolod nagligad nga Oktubre.
Suno kay Jail Senior Inspector Norberto Miciano, yara sila karun sa heightened alert status samtang yara sa ila kustodiya ang pito.
Priso karun sa NODJ sanday Noli Rosales, ang mag-asawa nga Romulo kag Margie Bitoon, Albert kag Karina Dela Cerna, Proseso Dela Cruz kag Cherryl Catalogo nga nagapangatubang sa kaso nga Illegal Possession of Firearms and Explosives.
Kaupod sang pito ang apat nga sanday John Milton “Butch” Lozande, Anne Krueger, Roberto Lachica kag Danilo Tabura nga ginpasakaan sang kaso.
Ugaling ang apat ang nagapangatubang lamang sang kaso nga paglapas sa Republic Act 10591 ukon illegal possesion of firearms kag nakapyansa ang mga ini.
Una nga nalakip ang onse sa masobra 50 ka mga indibidwal nga ginpang-aresto sang otoridad matapos ang pagserbe sang apat ka mga search warrants sa opisina sang Anakpawis, Gabriela kag Kilusang Mayo Uno (KMU) sa Bacolod.
