Gintsekyar na kahapon sang Commission on Election (COMELEC) – Bacolod ang warehouse nga pagabutangan sang mga Vote Counting Machine para sa palaabuton nga May 9, 2022 Election.
Suno kay Bacolod City Election Officer Atty. Revo Sorbito, wala pa mahibaluan kun san-o ipadala sang Comelec Main Office ang mga Vote Counting Machine.
Pahayag sang Election Officer nga samtang wala pa ang delivery, ila naman nga gintsekyar ang warehouse agud nga maseguro ang seguridad sang lugar, sa fire hazzard, indi flood prone kag maseguro nga protektado sa ulan kag sa yab-ok.
Isa man sa ginseguro sang mga ini nga maka-igo sa warehouse ang tanan nga makinaryas sa maabot nga piniliay.
Paathag ni Sorbito nga indi nila pwede nga ipahibalo kun sa diin igahamtang ang mga makina, samtang isa naman ka warehouse ang pagabutangan sang Vote Counting Machine kag iban pa nga election-related equipment sang Bacolod City kag Negros Occidental.
May kaangtaan sa delivery, pahibaluon na lamang ang mga ini kun na ship na sang Comelec Main Office ang mga kagamitan kag kun ano oras maga-abot agud nga mapreparahan sang mga ini ang pagsugat sa pantalan kag pagtransfer sa natalana nga warehouse.
Bangod 460 ang clustered precinct sa Bacolod City, ginalauman na nga kaangay man nga numero ang mabatun nga Vote Counting Machine.
Pasalig naman ni Sorbito nga may magabantay nga private security gikan sa warehouse gikan sa forwarder kag may igadeploy man nga personnel ang Negros Occidental Police Provincial Office (NOCPPO) kag Bacolod City Police Office (BCPO).
