Patay ang watchman sa isa ka buluthuan sa Silay City matapos ginbuno sang menor de edad nga iya ginpasakay sa tricycle.
Sa interview ang Bombo Radyo Bacolod kay Police Lt. Col. Mark Anthony Darroca, hepe sang Silay City Police Station, ang biktima ang ginkilala nga si Abner Lanosnia, 49 anyos, residente sang Purok Kalubihan, Barangay Rizal, Silay City, watchman sang Doña Monserat Lopez Memorial High School.
Samtang ang mga suspect ang ginalakipan sang magkahagugma nga lunsay 17 anyos kag 14 anyos nga manghod sang babayi.
Suno kay Darroca, alas-2:30 sang kaagahon kahapon samtang nagamaneho sang iya topdown tricycle, ginparahan si Lanosnia sang tatlo ka kabataan nga iya man nga ginpasakay.
Gintuyo sang 17 anyos nga lalaki nga kuhaon ang cellphone sang watchman, apang bangod ini ang wala ginhatag ni Lanosnia, siya ang hinali na lamang ginbuno sa dughan.
Suno kay Darroca, nagbulig man ang nobya sini nga 17 anyos.
Kasunod sini, nahimo pa sang biktima nga makapadulong sa malapit lamang nga ospital apang ini ang gindeklarar nga dead on arrival.
Ang tatlo ka suspect ang gilayon nga nagpanago sa sulod sang kampo, apang nahimo man nga madakop sa ginpatigayon nga hot pursuit operation sang Silay City Police Station.
Ang mga kabataan ang gindala na sa Department of Social Welfare and Development, bangod sila ang minor kag indi paman mahunong.
Nacontact naman kag napahibalo ang ila nga mga ginikanan.
Nakadepende naman sa desisyon sang korte kun mapasakaan sang kaso ang duha nga 17 anyos.
Suno kay Darroca dako ang papel sang ginikanan sa pagdisiplina sa ila mga kabataan kag indi pahanugutan nga magliyong sa dalanon sa tunga sang kagab-ihon.
