Padayon pa ang imbestigasyon sang La Carlota City Police Station agud matumod kun sin-o ang nagpatay sa 43-anyos nga watchman sang quarry nga nasapwan sa sulod sang kampo sang tubo sa Hacienda San Miguel, Barangay San Miguel kaina sang aga.
Ang biktima ang ginkilala kay Diovanie Bedonia, tumandok sang Barangay Ma-ao, Bago City, kag nagatrabaho sa quarry site sa Barangay Ma-ao.
Sa interview sang Bombo Radyo kay Police Lt. Col. Jonel Guadalupe, hepe sang La Carlota City Police Station, gintiro ang biktima sa natuo nga bahin sang iya tiyan.
Kagab-i, nagreport sa mga pulis ang mga residente nga nagapuyo malapit sa katubuhan nga may nabatian sila nga may nagpalupok sa kampo.
Gintinguhaan sang kapulisan nga lantawon ang lugar agud makit-an kun may tawo apang bangud malapad ang lugar, wala sang nakita nga tawo ang mga pulis.
Kaina sang aga, nagreport sa mga barangay officials ang nagatrabaho sa katubuhan nga may nakita sila nga bangkay sang lalaki kag sang ginlantaw sang pamilya, positibo nga ginkilala nga si Bedonia ang bangkay.
Santo sa panuaron sang mga nakakita sa krimen kagab-i, si Bedonia ang ginlambatan sang duha ka mga suspetsado gani nagdalagan ini pasulod sa kampo sang tubo kag ila nabatian ang lupok.
Suno kay Guadalupe, wala pa sang natumod nga suspetsado apang may posibilidad nga taga-ciudad sang Bago man ang responsable sa krimen.
Sa kaangot nga balita, ginhangkat sang iloy ni Diovanie Bedonia ang duha ka lalaki nga kaupod niya kahapon nga magpanugid kun may yara sila sang nahibaluan angot sa suspetsado nga nagpatay sa iya anak sa kampo sang tubo sa Hacienda San Miguel, Barangay San Miguel, ciudad sang La Carlota kagab-i.
Sa interview sang Bombo Radyo kay Vilma Bedonia, naglakat ang iya anak kahapon sang aga bangud may ginpasummon ini sa barangay nga lalaki nga may balayran sa iya.
Suno kay Mrs. Bedonia, nagtaliwan ang misis ni Diovanie sang tinalikdan nga bulan kag ang kwarta nga inugbayad kuntani sa punerarya para sa lungon ang ginbangka sini sa iya abyan kag nagdaog.
Nangin tayuyon ang pagdaog sa ginbangkahan apang sang ulihi, ginpahayag sang iya abyan nga wala na ang kwarta sa iya bangud ginpanagtag ini sa iban nila nga abyan.
Bangud wala na sang inugbayad ang wala ginhingadlan nga abyan, ginhawiran ni Diovanie ang motorsiklo sini kag gintugyanan nga balikan lang kun may yara na siya sang kwarta nga inugbayad.
Kahapon, nag-atubangay sa Lupon ng Barangay sanday Diovanie kaupod ang abyan nga sanday Julito Albar kag GB Torres alyas Bonbon apang pagkagab-i, wala na nakapauli ang biktima.
Nasugata pa ni Vilma sanday Julito kag GB apang ila ginpahayag nga naaksidente si Diovanie.
Naghapit man si Bonbon sa balay sang tiya ni Diovanie agud lang magpahibalo nga wala niya nakaupod ang biktima.
