Wala sa gihapon nakuha ang Water Pipe sang Bacolod City Water District nga yara sa tunga sang dalan sa Bakyas Bridge, Barangay Mansilingan, Bacolod City.
Nahibaluan nga ang main water pipe ang yara na nga daan antes pa man ginpalapad ang taytay apang ini ang wala mapalos bangod sa indi paghangpanay sang BACIWA kag Department of Public Works and Highways (DPWH).
Ginbutangan sang signage nga ‘Slow Down’ kag ‘Excavation Works Ongoing’ sa dalan kun diin nahamtang ang tubo kag bangod sa kadugayon nga wala ginakakas ang tubo sa karun may yara na sang mga hilamon nga nagtubo sa palibot sini.
Samtang, may yara naman sang nagatrabaho sa pagpatukod sang haligi sang taytay.
Sa interview sang Bombo Radyo kay Joshua Estoquia, helper sa ginapatigayon nga construction sa taytay, isa kag tunga ka semana pa lamang sila nagatrabaho sa pagtukod sang apat ka haligi sa taytay kag suno diri posible nga tubtob sa tatlo pa ka bulan antes matapos ang ila trabaho.
Ini bangod sa mga pag-ulan nga nagatuga sang pagbaha kag nagapa-delay sa ila nga trabaho.
Suno kay Estoquia, wala pa sila nahatagan sang direktiba nga tandugon ang tubo apang posible nga kun matapos na ang haligi diri na lamang itongtong ang tubo.
Samtang, ginabanta nga matapos sa bulan sang Nobyembre ang pagtukod sang haligi nga saylohan sang water pipe nga yara sa tunga sang dalan sa Bakyas Bridge, Barangay Mansilingan, Bacolod City.
Sa interview sang Bombo Radyo kay Department of Public Works and Highways (DPWH) – Bacolod Assistant District Engr. Lea Jamero, naumpisahan na ang pagtukod sang haligi sa kilid sang taytay kun diin isaylo ang tubo.
Suno diri, nadelay ang trabaho sang nakaligad bangod may yara pa sang ginpatigayon nga bidding ang Bacolod City Water District (BACIWA)- PrimeWater.
Sa tion nga matapos ang haligi mahimo na nga kakson ang tubo sa dalan kag isaylo sa kilid sang taytay.
Ginabanta sini nga matapos ang pag-construct sang haligi sa Nobyembre 30 kag matigayon na nga masaylo ang tubo.
