BACOLOD CITY — Ginalauman sang Bacolod City Water District (BACIWA) nga antes matapos ang 2018 maaprubahan na sang Local Water Utilities Administration (LWUA) ang ginhingyo sini nga pagpasaka sa water rate.
Suno kay BACIWA General Manager Atty. Juliana Carbon, pila na katuig nga pending sa LWUA ang ginhingyo nila nga saka sa 208 pesos nga minimum nga balayran.
Suno kay Carbon naghingyo ang BACIWA sang 40 pesos nga saka sa minimum rate.
Nahibaluan nga ang 208 pesos nga minimum water rate sang 2009 pa ginapatuman sang BACIWA kag nagapati ang General Manager nga kinahanglan na nga pasakaan ini bangud nga nagamahal naman ang tanan.
Sa pihak nga bahin, ginpahayag ni Engr. Jenelyn Gemora, Assistant General Manager B for Operations sang BACIWA nga tubtob sa karun wala pa sang klaro kun san-o makapatubod ang injection point number two sang bulk water supplier nga nahamtang sa banwa sang Murcia.
Suno diri, posible nga sa bulan sang Mayo pa makadeliver sang tubig ang injection point number two.
