Ginkumpirmar sang provincial administrator sa probinsya sang Negros Occidental nga plastado na ang water security plan sa probinsya.
Sa interview sang Bombo Radyo Bacolod kay Atty. Rayfrando Diaz, nga gin-aprubahan na sang konseho ang Provincial Integrated Water Security Plan (PIWSP), nga may tinutuyo nga magsabat sa mga problema sa water security kaangay sang increasing investments sa tubig, pagpasanyog sa kapasidad sang water service providers, kag pagplano para sa long term source development, kag pagprotekta kag pagconserve sang watersheds.
Suno kay Diaz, Provincial Integrated Water Security Plan (PIWSP) ang ipalapnag man nila sa mga local government units (LGU) sa probinsya agud nga makahimo man ang mga ini sang City/Municipal Level Water Security Technical Group para sa mas systematic kag organized interventions agud mapasanyog ang water security sa probinsya.
May yara na sang pondo ang probinsya nga P90 million para sa programa apang indi pa ini makaigo gani kinahanglan nga magpangayo sang dugang nga suporta sa mga local government units (LGUs) kag national government.
Ang P90 million ang aprubado na sa 2023 budget.
May yara naman sila sang gin-umpisahan nga proyekto sa 60 hectares nga duta sang probinsya sa Sitio Tambara, Barangay San Fernando, Talisay City, Negros Occidental kun sa diin gin-ayo man sang probinsya ang mga residente nga nagapanag-iya sang 3 hectares nga duta nga isurrender ang land area sa probinsya agud nga ang probinsya na ang magasto para sa reforestation.
Ginhatagan naman sang trabaho sang probinsya ang nagsurrender sang duta agud mabuligan sang pang adlaw-adlaw.
Sila ang nagabantay sang proyekto sang probinsya kag magsiguro sang slope protection.
Sa nasambit nga lugar may yara naman sang multi purpose building kag camp site kasubong man may ginapatigayon nga ecological programs.
