Ginakwestyon sang Water Watch Negros kun ngaa tubtob sa karun ang Bacolod City Government ang nagastick sa PrimeWater kag Bacolod Bulk Water Incorporated.
Sa interview sang Bombo Radyo Bacolod kay Water Watch Negros Convenor Wennie Sancho, ginapakamaayo sini nga mismo si Bacolod City Water District (BACIWA) Chairman Atty. Sonia Verdeflor na ang nagpagwa sang statement angot sa kapaltahan sang PrimeWater.
Ini kasunod sang ginpagwa nga panugyan ni Verdeflor sa mga Bacolodnon nga magtipon na sang tubig bangod sa paandam sang BBWI nga maga-untat ini sa pagsupply sa Lunes kun indi mabayaran sang PrimeWater ang P11 million nga utang.
Nagapati si Sancho nga luyag lamang sang BACIWA Chairman nga pahugon ang PrimeWater nga kinahanglan na sini nga bayaran ang obligasyon.
Aminado man si Sancho nga parehas lamang nga indi maayo ang serbisyo sang PrimeWater kag BBWI.
Suno diri, dapat ang Committee on Energy and Public Utilities sa pagpamuno ni Councilor Bobby Roxas ang dapat maghimo sang tikang.
Panugyan sini nga magpatigayon sang open bidding sa tanan nga qualified nga maghatag sang water supply.
Ini bangod ang BBWI ang indi man makasustiner sang ila promisa nga supply sang tubig para sa ciudad.
