Panawagan sang Water Watch Negros nga indi maapektuhan sa pagsaylo ni Senator Mark Villar sa Senate Majority bloc ang kaso angot sa kapalpakan sang PrimeWater Infrastructure Incorporated.
Sa interview sang Bombo Radyo Bacolod kay Water Watch Negros convenor Wennie Sancho, indi madula ang public perception sa posibilidad nga may natabo nga internal political arrangement, kag ang posibilidad nga matabunan ang isyu sa PrimeWater.
Gani suno diri, dapat nga bantayan sang mga water consumer ang hulag sang kaso, bangod ang tuman ka damo sang nahalitan sang water company.
Aminado ini nga normal na nga hulag sa politika ang pabaylo-baylo sang partido, kag sang sadto kontra ang hinali na lamang nga nangin abyan.
Apang pahanumdom sini sa mga opisyal sang gobyerno nga antes ang political interest, dapat mangibabaw ang pag-address sa panawagan sang publiko.
Suno diri, gusto nila nga mahibaluan kun ano ang mangin epekto sa kaso kag ano ang kabaylo sang pagsaylo ni Senator Mark Villar sa Senate Majority bloc.
Samtang makita man niya nga kaangay nga nagtunga si Senator Mark kag Senator Camille Villar bangod ginatakos pa nila kun sa diin nga kampo mas makabenipisyo.
Pahanumdom niya nga vital commodity ang tubig, kag importante nga may transparency, indi kaangay sa ginhimo sang PrimeWater nga sa mga balita na lamang nahibaluan nga ginbaligya na sa Hiraya Water Corporation.
