Gin-athag sang convenor sa Water Watch Negros nga indi lamang removal sang opisyales ang dapat matabo sa Bacolod City Water District kundi kongkreto nga reporma.
Sa interview sang Bombo Radyo Bacolod kay Wennie Sancho, maayo na nga panugod ang pagpahalin kay BACIWA General Manager Mona Dia Jardin, apang ang ila gid nga ginapangita amo ang reporma sa polisa kag maayo nga serbisyo.
Apisar nga ginpahayag nga nag-expire na ang term ni Jardin gani siya ang ginbuslan kay Engineer Michael Soliva, nagapati si Sancho nga may nakomiter ukon alegasyon sang bayolasyon si Jardin bangod sa gingamit nga termino nga “lost of trust and confidence”.
Panindugan sini nga ang luyag gid sang Water Watch amo nga iteminate sang BACIWA ang Joint Venture Agreement sa PrimeWater.
Kasunod sini, dapat nga magpasad sang bag-o nga polisa, kag dapat nga pa-intrahon man sang BACIWA sa bidding process ang tanan nga qualified nga water supplier.
Ini bangod natalupangdan nila nga kaangay nga ginalimitahan ang pagsulod sang mga water suppliers kag nagakalaktan sang pamulitika.
Kun sa diin ang ginabatun lamang ang may kilala sa Board of Directors, ukon kilala sang mga matag-as nga opisyal sa ciudad kaangay sang alkalde kag mga konsehal.
Panawagan ni Sancho nga sa reporma, dapat magapanguna gid nga ginakonsiderar ang welfare sang konsumedor.
Panindugan sini nga dapat ma-untat na ang JVA bangod kaangay nga dekorasyon lamang ang BACIWA Board of Directors, kag ang PrimeWater lamang gihapon ang nagadominar.
Suno diri, dapat policy making body ang BACIWA Board of Directors, apang makita nga PrimeWater gihapon ang nagakasunod kag ang ila nga gina-una amo ang ginansya sangsa ikaayo sang water consumers.
Ginalantaw man nila nga ginhimo lamang sacrificial lamb si Jardin, kag ginpahalin sa pwesto agud mapakalma ang kaakig sang mga konsumedor, apang panindugan ni Sancho nga indi mag-untat ang pag-ibwal sang mga pumuluyo kun wala sang reporma.
