Ginahangkat ni Water Watch secretary Wennie Sancho ang mga opisyales sa Bacolod nga maghimo sang tikang tuhoy sa mahigko nga tubig kag indi maayo nga serbisyo sang Bacolod City Water District (BACIWA) kag Prime Water sa ciudad.
Sa interview sang Bombo Radyo kay Sancho, nagapanawagan ini kay Mayor Alfredo Benitez, Vice Mayor El Cid Familiaran, mga konsehal ilabi na si Councilor Kalaw Puentevella nga amu ang chairman sang Committee on Energy and Public Utilities, nga magpatigayon sang public inquiry ukon public hearing agud ma-address ang problema sa tubig nga masami nga gina-ugtasan sang mga konsumedor kag nagahatag sang inconvenience.
Nagapati man ini nga kinahanglan sang rehabilitation sa mga mga tubo kag gamit sang BACIWA bangud humalin pa ini sang 1950s kag ini ang isa sa mga kabangdanan sang mahigko kag lubog nga tubig nga nagagwa sa gripo sang mga konsumedor.
Suno diri, nangin failure ang BACIWA kag Prime Water sa paghatag sang potable water sa ciudad kag dapat ini nga hatagan sang atensyon sang mga opisyales.
Suno sa iya, dapat nga magpatigayon sang congressional inquiry ang city council agud maaddress ang ini nga problema indi lamang sang mga pumuluyo kundi pati sang business sector.
