Ginpalos na sang Marso 1 ang wax figure ni Russian President Vladimir Putin gikan sa Paris Grevin Museum bilang pagprotesta sa nagaluntad nga invasion sa Ukraine ilabi na nga ini ang ginahalitan sang mga nagabisita sa museum sa tion nga ila makita.
Ang estatwa nga ginhuman sang tuig 2000, ang ginkuha na gikan sa warehouse kag ginakonsiderar naman sang museum nga ini ang islan sang estatwa ni Ukrainian President Volodymyr Zelensky.
Suno kay Museum Director Yves Delhommeau, indi na maayo sa karun ang pagpresentar sang karakter kaangay kay Putin, kag ang pagpalos sa estatwa sini ang una nga kahigayunan naman sa maragtas sang museum nga sila ang may ginwithdraw nga estatwa bangod sa nagakatabo nga historic events.
Nahibaluan nga antes paman ginkuha ang estatwa, ini ang makapila ka beses naman nga gin-atake sang mga visitors nga tuman ang kaakig sa presidente.
Dugang pa sang Museum Director nga indi man sini kag sang iya mga staff luyag nga adlaw-adlaw nalang nga kay-uhon ang buhok kag nawong sang estatwa sang Russian President.
Santo sa museum spokesman, wala pa sang kaseguruhan kun san-o mahimo ibalik sa museum ang estatwa.
Sang ginpamangkot si Delhommeau kun ano ang igabulos sa estatwa ni Putin nga napatung-an sang estatwa nanday US President Joe Biden kag Chinese President Xi Jinping, ginpahayag naman sini nga mahimo nga si President Volodymyr Zelensky sang Ukraine.
Ini bangod ginkabig naman ini nga hero matapos nga nagpanindugan nga mag-atubang sa Russia sangsa magpalagyo gikan sa gina-atake nga pungsod.
Dugang pa sang Museum Director nga ang actor-turned President ang nagakadapat lang nga maupod sa iban pa nga mga kilala nga pangalan sa history sa karun.
Nahibaluan nga sang 2014, kasunod sang pagiagaw sang Russia sa Crimea gikan sa Ukraine, isa ka demonstrator nga may pinta sa dughan nga nakasulat “Kill Putin” ang nagbuno sa estatwa kag nagwasak sa ulo sini.
