Nagpanawagan ang Women and Children’s Protection Desk sang Bacolod City Police Office sa mga ginikanan nga tungdan ang ila responsibilidad agud mabuligan ang PNP kag DSWD nga mapunggan ang problema sa children at risk kag children in conflict with the law.
Sa interview sang Bombo Radyo kay WCPD head Police Lt. Arlyn Torrendon, dako ang papel sang mga ginikanan gani magabuligay lang kuntani ang kada isa, kaupod ang iban nga ahensya sang gobyerno.
Suno kay Torrendon, wala pasilidad nga butangan sang children at risk bangud ang Social Development Center ang ginabutangan sang children in conflict with the law samtang nagaatubang sang ila kaso.
Suno sa WCPD head, nagabalik-balik lang ang children at risk gani nagasaylo-saylo ang mga ini halin sa fast food chain sa Dalan Lacson padulong sa Singcang Airport.
May iban naman nga ginikanan suno sa iya nga nagasiling nga itugyan sa mga pulis ang pagdisiplina sa ila mga kabataan gani ginalantaw sini nga mahimo nga may problema gid sa ila balay gani nagaliho-liho ang mga kabataan.
Mas makabulig man suno kay Torrendon kun sapulon sang barangay officials ang mga ginikanan bangud ang children in conflict with the law ang makahibalo na maghimo sang katuntuhan sa huben nga paminsaron.
Mas maayo man suno kay Torrendon kun mas mapabug-atan pa gid ang pina sa mga ginikanan sang mga menor de edad nga ginapabay-an.
Nagpanawagan man ini sa mga pumuluyo nga likawan ang paghatag sang limos sa mga kabataan bangud ginatolerar ang ila nga pagtinir sa dalan.
