Ginpaandaman sang weather forecaster sang Negros Occidental Provincial Disaster Management Program Division (PDMPD) ang mga nagapuyo malapit sa suba, baybay, kag bukid nga maghalong sa ginalauman nga madamol nga ulan nga dala sang bagyo VERBENA.
Sa interview sang Bombo Radyo kay Dave Cuajao, ang Tropical Depression VERBENA ulihi nga nasiplatan nga yara sa 205 km East sang Surigao City, Surigao del Norte kag dala sini ang kabaskugon sang hangin nga nagadangat sa 45 km/h kag pagmadlos nga tubtob 55 km/h.
Ang Bagyo ang nagahulag padulong sa nakatungdan nga dereksyon sa kadasigon nga 15 km/h.
Suno diri, ang bagyo may kalaparon nga 200 km ang rain radius.
Lauman nga matupa ang bagyo karun sa gab-i kag ini magwa sa Philippine Area of Responsibility sa Huwebes alas- 8:00 sang aga.
Sa Luzon area, napaidalum sa Signal No. 1 ang Occidental Mindoro, Oriental Mindoro, Romblon, kag northern portion sang Palawan; sa Visayas area, SIgnal No. 1 sa Antique, Aklan, Capiz, Iloilo, Guimaras, Negros Occidental, Negros Oriental, Siquijor, Cebu, Bohol, Samar, Eastern Samar, Biliran, Leyte, kag Southern Leyte; kag sa Mindanao, Signal No. 1 sa Occidental Mindoro, Oriental Mindoro, Romblon, Dinagat Islands, Surigao del Norte, northern portion sang Surigao del Sur, Agusan del Norte, northern portion sang Agusan del Sur, Camiguin, kag eastern portion sang Misamis Oriental.
Abiso ni Cuajao sa mga nagapuyo sa kilid sang suba, baybay, kag bukid nga magulu-aligmat sa posible nga pagtiphag sang duta kag pagtaas sang tubig kag indi na maghulat pa sa mga rescuers sa tion nga magsaka ang tubig, mag-evacuate na gilayon.
