Temporaryo nga ginhimo anay nga standby vessel ang Weesam 6 matapos ang natabo nga pagka-abreya sini sa tunga sang lawod sang Nobyembre 21, samtang nagapabilin naman nga duha ang mga fastcraft vessel nga nagabyahe tabok sa Negros kag Panay Islands.
Sa interview sang Bombo Radyo Bacolod kay Frank Carbon, general manager sang Weesam Express, duha sa karun ka mga fastcraft vessel ang nagabyahe nga ginalakipan sang Weesam 1 kag Weesam 3 nga nagabyahe sang apat ka round trip sa kada adlaw.
Paathag ni Carbon nga sang na-out of commission ang Weesam 6 bangod sa insidente nga pagkapatay sang makina sa tunga sang lawod nga ginatudlo tuga sang steering issue, temporaryo anay nga ginstandby ang barko.
Madumduman nga madamo sang mga naglain ang pamatyag gikan sa 172 ka mga pasahero sang barko matapos nga nagdangat sang inoras antes sila ang naguyod pabalik sa Bredco port.
Sa karun ang Weesam 6 ang nagapaidalum sa maintenance repair kag natalana pa nga ipaidalum sa sea trial.
Bangod ginalauman na nga sa yuletine season magasaka ang influx sang pasahero nga magatabok-tabok sa Panay kag Negros Island, ang Weesam 6 ang ginbuslan sang Weesam 1 nga mas may dako nga capacity.
Ginahulat paman nga mahatagan sang Maritime Industry Authority (MARINA) sang go signal ang Weesam 6 matapos ang maid-id nga inspection sa kapasidad kag safety sang barko.
Suno kay Carbon, ang Weesam 6 ang magaserbe na nga standby vessel inkaso magkaproblema, maguba, ukon kinahanglan sang cleaning sang mga nagabyahe nga fastcraft vessel.
